مرحبآ واهلين

اتمنى انكم تستمتعون بمدونتي

• ننفخ بقربة ًمنشقه

  بسم الله الرحمن الرحيم
  دايم الوالد الله يحفظه كان يقول لي الاولين ماخلو للتالين شي !! وكنت اضحك لما يقولها طبعاً مجامله لاني مافهمت وش مقصده منها ...!!
  ولكن
  حنا بشر نعرف الصح والخطأ بس نخلي الخطأ صح والصح خطأ، يهمنا امر هالامه بس والله ماجبنا خبرها، نغار على الدين ونطبقه ، نصلي الصلوات الخمس ونتسنن ونصوم رمضان والست والوقفه و نتهجد، نتصدق ، نصل الرحم ونبر بالوالدين .. لكننا بين الصلوات الخمس نسب فلان و نشتم علان وبعد الفطور في ليالي رمضان يمكن بنا اللي يسكر والا يحشش ، وبالعشر نتجهز لعيدنا ونسرف ناصل الرحم من العيد للعيد، هذي رؤوس اقلام لحياة بعض السعوديين من منظور سنوي..!!
  حنا بشر نعرف الصح والخطأ بس نخلي الخطأ صح والصح خطأ، يهمنا امر هالامه بس والله ماجبنا خبرها، نغار على الدين ونطبقه ، نصلي الفجر اذا قمنا للدوام ،النفس خايسه والمزاج قلقان ، زوجته تصحيه من قبل صلاة الفجر وماانتبه و يوم دقت ساعه الدوام فز من طوله وارتبش واختبص ولبس ثيابه على عجاله وطلع بعجاله وهو بالطريق .. يووووه ماصليت الفجر ... ماعليه اصلي بالدوام !! ارخص لنفسه واجاز حكم تأخير الصلاه.
  وصل دوامه ومتأخر دقيقتين ... اليوم اجتماع وبلمح البرق جهز نفسه وضبط اوراقه وانطلق لقاعه الاجتماعات تناقشو وتباحثو في امور تخص العمل ... في نص الاجتماع تذكر انه لسى ماصلى الفجر .. ماعلية اصلي بعد الاجتماع .. خلص الاجتماع الساعه 11 وصلى الفجر وبصلاة الفجر " سجد سجود السهو.. "
  صلى الضهر جماعه مع زملائه بالعمل .. والامام سجد سجود السهو والجمااعه يوم سلم سئلوه ليه سجدت السهو ؟
  ضحك وقال " خمس ركعات صلينا الظهر "
  " الجماعه كلهم في حاله سهو "
  وبعد الصلاه كان الاجتماع بمكتب واحد من الشباب .. ومن هناك الضحكات تتعالى ويرتفع صوتهم حتى انزعج منها مدير الاداره وفجأه باب المكتب يفتح
  على ايش تضحكون ؟؟
  شفت شلون الجماعه كلهم في حالة سهو !!؟؟
  طلعو من الدوام الظهر ، اليوم الاربعاء والمزاج رايق ، وفي الطريق للبيت جاه تيلفون ... ياابو فلان اليوم عند فلان الجو رايق .. ابشر، ومتى وعدنا ؟
  تغدى بالبيت وهو يصارخ ويلج ويهاوش عشان ام عياله طلبته يجلس اليوم عندها مسكينه ولهانه عليه من شهر العسل ماسهرت معه .. آسف يامره انا مواعد فلان وابروح معه بنروح المقهى ونتابع كوره وشويه افلام .. وبعد الغدا نام .. فتح عيونه الساعه ثمان .. توضى وصلى العصر والمغرب والعشاء .. يمّه يبه بطلع ربعي ينتظروني على العشى .
  وعند ربعه .. صوت الطرب عالي والبنات تتمايل وهم في حالة سكر ،، مسكينة ام عياله
  الساع 5 الفجر صوت المسج من جوال ام عياله .. حبيبتي لا اجد طريقةً اقدم بها اعتذاري لكي ولكن الوقت سرقني اعلم انك سهرتي بأنتظاري وانا الان بالطريق لاكمل معك باقي سهرتي .. ام عياله تتمنى تقرى هالمسج من بعد الزواج ماشافت دلع وتفجأت انها مسج سداد فاتوره
  اما خوينا عند ربعه غاط بسابع نومه ولاهو جايب خبر ،، لانه من امن العقوبه اساء الادب ... صدقت ياابوي بأن الاولين ماخلو للتالين شي
  
  حنا بشر نعرف الصح والخطأ بس نخلي الخطأ صح والصح خطأ، يهمنا امر هالامه بس والله ماجبنا خبرها، نغار على الدين ونطبقه ، نصلي الصلوات الخمس ونتسنن ونصوم رمضان ، بنفسً شينه ونقضي نهارنا سب ولعان وبعد الفطور دقت بلوت لين الفجر نتسحر وننام لين العصر نصلي الظهر والعصر بوقت العصر اهل البيت في حالة ذعر ابونا لا ينفجر .. في قمة خرمته وفي حاله مستعصيه هستيريه في اغلب الاوقات ..
  وفي ليلة العيد، وفي جميع مناطقنا الحبيبه حيث الاستمتاع في صرف المبالغ الطائله كل شي في ذلك اليوم يزدحم ،، اصوات الاغاني تملأ الاجواء مباشره بعد اعلان مشاهدة هلال شهر شوال.. رمضان لم ينتهي ونحن في آخر يوم من ايامه لعلنا نبكي لفراقه... ولكن؟ ... اما في الصباح فالوجوه فرحه وعابسه ،، فرحه بذهاب رمضان وعابسه من وصل الاقارب .. المغصوبه ماتدر قالها الوالد الاولين ماخلو للتالين شي
  وفي يوم العيد مساءً .. المطارات تزدحم .. جسر البحرين يشتكي .. المنافذ في حالة استنفار السعوديون كلهم سافرو للتنفيس !! من بعد سجن رمضان !!!!!
  انطلق خوينا من باب بيته مودعاً زوجته بصراخه المعتاد من بعد صيحات تعالت منهم رفضاً لرحلته لكن لاحياة لمن تنادي، متجها الى المطار برفقة ربعه الى ارض لم يمنع بها مامنع ، ليعيش لياليه الحمراء عذراً السوداء .. ولهدف غسيل زيوت رمضان من معدته ، عزيزي "خوينا" انتبه لحسناتك لا تنغسل
  خوينا وصل ارض الوطن بعد رحلة سمر وانعزل بملحقه لمدة اسبوع في حالة هم وغم وقلق.
  خوينا رجع دوامه وباشر بسرد افلامه وهو فرحان باللي سواه ويفتخر،شفتو نمت مع فلانه ورقصت مع علانه سهرنا سهره خورافية اما شاشة جواله ففي عرضً مستمر من رقص وثماله، ماكفاه رواية رساله ، اما ضحكاته فيملأها الحنين لارض الحريه، هذا زمنٌ نسيت به الامانه وفيه لُبِس رداء الخيانه.
  
  حنا بشر نعرف الصح والخطأ بس نخلي الخطأ صح والصح خطأ، يهمنا امر هالامه بس والله ماجبنا خبرها، نغار على الدين ونطبقه ، نصلي الصلوات الخمس ونتسنن ونصوم رمضان والست والوقفه و نتهجد، نتصدق ، نصل الرحم ونبر بالوالدين بسنه السلام وقلة الكلام ننعتهم بقلة المعرفة وكبر السن ادى الى تصلب الفكر و التهميش هو اساس المعاملة ، سم يايبه ، ولا يهمك يايبه ، اللي تبيه يصير هذي احلام اليقضه.
  مااغرب من متعة الاستماع الى سفاسف الامور وما اصعب من سماع القرآن!!
  وما اجمل من ديننا ؟ و مااحب لنا من رسلونا ؟
  وما اجمل الايمان بالله وطاعته ؟
  وما اقسى تأنيب ظميري بعد الخطأ؟
  
  سبقني بها عكاّشة :
  اعلم ان هناك من كتبو مااردت كتابتة ووصلو الفكره بأناقه عاليه وبفكر راق ولغة جميله نحويه وبتصريفات متمكنة ولكن نحن
  ننفخ بقربة ًمنشقه
  
  .............
  
  ...بقلمي...

  • 3 July 2011
  • 0 comments
  • no rating