MANNN HOTA HAY

• Share

Thursday, 31 January 2008 at 06:33

http://netlog.com/helladevilsshaan haiderhaidershaanhelladevilshttp://en.netlogstatic.com/p/tt/011/674/11674548.jpgPakistanPunjab helladevils

vo bhii kyaa log the aasaan thii raahein jin kii
band aaNkhein kiye ik simt chale jaate the
aql-o-dil Khvaab-o-haqiiqat kii na uljhan na Khalish
muKhtalif jalve nigaahon ko na behlaate the

ishq saadaa bhii thaa beKhud bhii junuuN peshaa bhii
husn ko apnii adaaon pe hijaab aataa thaa
phuul khilate the to phuulon mein nashaa hotaa thaa
raat Dhaltii thii to shiishon pe shabaab aataa thaa

chaaNdanii kaif asar ruuh afzaa hotii thii
abr aataa thaa to bad mast bhii ho jaate the
din mein shorish bhii huaa kartii thii hangaame bhii
raat kii god mein muuNh DhaaNp ke so jaate the

narm rau vaqt ke dhaare pe safiine the ravaaN
saahil-o-bahr ke aaiin na badalte the kabhii
naaKhudaaon pe bharosaa thaa muqaddar pe yaqiin
chaadar-e-aab se tuufaan na ubalte the kabhii

ham ke tuufaanon ke paale bhii sataaye bhii hain
barq-o-baaraaN mein vo hii shamein jalaayen kaise
ye jo aatish kadaa duniyaa mein bhaDak uTThaa hai
aaNsuon se use har baar bujhaayen kaise

kar diyaa barq-o-buKhaaraat ne mehshar barpaa
apne daftar mein litaafat ke sivaa kuchh bhii nahiin
ghir gaye vaqt kii beraham kashamakash men magar
paas tehziib kii daulat ke sivaa kuchh bhii nahiin

ye andheraa ye talaatum ye havaaon kaa Kharosh
is mein taaron kii subuk narm ziyaa kyaa kartii
talKhii-e-ziist se kaDvaa huaa aashiq kaa mizaaj
nigaah-e-yaar kii maasuum adaa kyaa kartii

safar aasaan thaa to manzil bhii baDii raushan thii
aaj kis darjaa pur asraar hain raahen apanii
kitnii parachhaaiyaaN aatii hain tajallii ban kar
kitne jalvon se ulajhatii hain nigaahein apanii